終結暴政分邦自主（五）

獨立自主對現今大陸飽受暴政虐待嘅平民大眾，係一個非常有吸引力嘅口號。但係各地獨立自主過程中，會有用心不良，或者支性未除，滿腦帝皇君權權威思想嘅人，喺權力慾薰心或者自私自我嘅念頭驅使下，騎劫獨立運動，將獨立成果“私有化”，變成類似前蘇聯解體後一啲加盟共和國咁，造就咗一大堆乘亂搏懵嘅獨裁永續執政者。
佢哋推翻咗前蘇聯共產黨，成立咗新嘅所謂“共和國”（中國共產黨都叫自己做“人民共和國”），但係呢班所謂新嘅執政者無為當地人帶嚟改善，無容納當地民眾唔同意見，只係搭推翻舊暴政嘅順風車，而騎劫民眾渴望獨立自主同趕走暴政嘅良善意願，將之轉化為自己獨裁濫權專政嘅基礎，變成類似軍閥獨裁國家，呢類“惡鄰”國家，無人鍾意同佢哋做鄰居，因為佢哋嘅暴政同樣帶嚟好多問題，例如經濟政治難民、跨國幫會流氓活動，同埋違反人權嘅罪行（販賣人口婦女），甚至軍事恫嚇例如北韓擁核試射等，呢啲社政經問題會輻射到鄰近國家地區，只會令成個東亞大陸更緊張。
東北亞已有一個北韓，西南又有一個緬甸同大堆軍閥毒梟。如果大陸暴政結束後，喺華北、東北、西北、東南或其他大陸地區，冒出一個或幾個獨立出嚟嘅暴政，對東亞其他地方嘅民眾同政府，都係一個極大威脅。
無人想接受推翻咗一個暴政後，又出現一堆野蠻獨裁流氓政府。大家都只想安居樂業，同有一個對當地所有公民負責嘅民選政府。
最危險嘅，除咗當前嘅共產黨，同隱藏黨籍嘅地下共產黨外，往往就係一直喊口號，戴住推翻暴政面具嘅人，天曉得呢少撮人會唔會係法國大革命裏面不斷推人上斷頭臺嘅羅伯斯庇爾，抑或係開口埋口天父上帝但殺人納妾嘅洪秀全楊秀清之流？