終結暴政分邦自主（一）

成個東亞大陸受共產中國壓逼嘅少數民族，蒙藏東突基本上無一倖免。東突人反抗共產官員壓逼被屈“恐怖分子”，藏人佛教尊者流亡外國，蒙古學童被禁學習蒙語蒙文，粵人政治受盡歧視壓制，連講句粵語都被視為分離主義，卻繼續為共產中國經濟輸血。
東突人先知先覺，多年前已開始武力反抗。藏人僧侶亦有自焚，體現捍衛藏佛宗教，視死如歸嘅反抗義舉。
蒙藏東突平民都有自己子姪苗裔，被逼接受洗腦劣質教育，愚忠於獨裁暴政，甚至為不同紅色權貴派系做違背良心嘅事：講大話、聯手欺壓其他無辜平民、監控民眾、媒體發佈假言論等，又參與令人髮指嘅性侵、活摘器官或系統殺人，犯下普世法律都唔容許嘅刑責。普通平民連自己子姪學下外國或本地語言都被講成勾結外國勢力搞分離主義，聖誕節同本地節日都唔准慶祝，咁同被軟禁喺一個大嘅共產監獄度有咩分別？
東亞地區本來係一個好多唔同文化嘅社會，無論宗教語言飲食生活習慣，都有自己嘅特點而唔需要咩中央支援干預。只要當地有為選民負責嘅政府，有合理法律規範，有傳媒監察，有選民嘅選票制衡，當地人就可以安居樂業，而唔需要事事被專斷嘅共產黨野蠻操控干預。
蒙古人有自己嘅民族國家蒙古國，東突人49年以前有長久立國抗爭歷史，藏人一直有自己宗教領袖傳統信仰，佢哋都值得有自己一人一票選出嚟嘅政府同議會，為當地民眾服務，而唔係由共產黨指派一個所謂有民意代表嘅官，“管治”為名，剝削同搾取資源利益，行殖民本質為實。
東突地區內蒙地區同西藏地區嘅面積人口以至傳統文化，都有各自成立自給自足邦國嘅條件，先自立再定走向，有民意授權兼具規模效益嘅，可以自組盟邦，經濟甚至政治軍事攻守同盟。
既然文化、文字同歷史都同關內漢人唔一樣，就應該早日合力反抗，至少唔好俾自己下一代繼承自己喺共產黨統治下嘅奴隸身份同生活。