終結暴政分邦自主（四之二，謊言文宣完）

大外宣系統除咗以傳統紙媒同電子媒體，壟斷審查海內外有關中國大陸以至台港澳嘅發言權外，隨住劣質紙媒同未達市場競爭合格標準嘅出版物而趕走傳統讀者，以及年輕一代乃至年青新聞工作者不信任紙媒外宣而另僻自媒體道路開始，網軍、五毛同公關公司成為暴力政權維穩嘅牟利生態圈，呢個生態圈其實幾似蘋果、微信同支付寶之類嘅Ecosystem。
成個運作道理好簡單：針對全世界每個政府都不可避免嘅施政失誤包括中國共產黨，然後以幫政府轉移不滿視線嘅前題下，尋找一個政治責任替死鬼，可以係少數民族例如維吾爾人，老屈佢哋恐怖分子，將地方官暴政同失誤略去；可以係法輪功，放大佢哋嘅影響力同宗教某些不能驗證嘅言論；可以係台獨，本來台灣年輕一代就因產業空洞化而對更緊密經貿協議反感懷疑，就變成無國族意識搞台獨；可以係港獨，最諷刺係提倡“民主回歸”嘅大中華膠“民主黨”，年年六四風雨不改維園集會，被屈“勾結外國勢力”，原來同外國領事食個飯都會勾結到外國勢力咁兒戲。
由於中國政府確係有施政失誤，而唔同派系權力鬥爭又各有盤算，所以文宣系統亦能堂而皇之向政府拎資源發動各類文宣攻勢，呢種製造敵人或養放“寇敵”自擴勢力喺傳統歷史並唔係新鮮事。
唐末藩鎮同清末湘淮軍乃至地方督撫同樣係咁玩，藉此擴大自己影響力同財力，同時提拔一批文宣管理層“共富共享”資源，其實係傳統文化反轉嘅黑暗玩法，而放養嘅網軍（指帶風向而非黑客）執行嘅名目指令係屬於文宣系統之下，所以都唯文宣系統馬首是瞻，形成中國大陸媒體種種失衡現象：傳媒唔係報導新聞（事實真相），而係講官方立場，其實只係政府新聞發布會嘅傳媒版本。
咁一啲關係到地方民政民生疾苦嘅新聞，特別牽涉到失職瀆職官員，探討制度漏洞嘅揭發類型新聞報導，有無媒體夠膽經營開拓？
對唔住，中國大陸從來無新聞報導，只有讀官方新聞稿同宣傳稿，只要損害到中國政府，中國共產黨名譽，一概不報，除非係個別派系透過媒體打擊政敵，否則難以得知地方疾苦背後真相。
如果成個大陸唔同地方媒體都無自己嘅意志講出當地問題，台北媒體講北京政府想聽嘅說話，港澳媒體講北京政府啱聽嘅話，藏媒蒙媒疆媒都講北京政府想聽嘅話，咁當地人只會不滿媒體做法而遠離唔睇唔聽，因為當地人最清楚自己生活嘅地方好壞得失，媒體偏報只會令原本信任佢哋嘅讀者觀眾流失，其實係同貼錢自殘無分別。
更諷刺嘅係中國政府又被逼砸大錢發展自媒體網軍干擾本來矯錯成長嘅網路媒體，以前養嘅傳統媒體起唔到作用，仍需俾錢養住，後面一堆新網軍又要伸手拎官餉。而即使靠廣告收入分成，亦只有假流量，因為真正留意時事嘅當地人根本唔信呢啲假流量媒體，變成惡性循環，這些網軍唯有靠滲透真流量媒體做法例如留言或投訴方式，打擊呢啲敢言有個人意志嘅媒體，咁做就直接引起國際社會反感，因為網路巨頭對資訊自由流通呢個原則喺法律同生存原則係唔可能退讓。
所謂掌握輿情，並非反映民情，掌控操弄輿情，佢嘅本質只係一個唯個別文宣派系嘅利益生態圈，偏離新聞本業反映事實嘅守則，更係造成咗各地同中國政府越行越遠其中一個民心背向推力。媒體唔講事實，就形同報廢咗嘅財政黑洞一樣。如果分邦，起碼每個地方媒體生態擺脫共黨文宣利益系統，令地方媒體可以有自己獨立嘅生存環境，整個華語媒體生態圈會大為不同，而唔係淪為索餉說謊做假傾軋嘅工具。