終結暴政分邦自主（四之一，未完）

美籍華裔導演趙婷講過，中國係一個充滿謊言嘅國家。
如果謊言係一個國家生活中普遍嘅現象，呢個國家嘅管理同運作肯定出現咗好大兼好多問題。
中國有一大堆媒體，數目之多應該傲視全世界，甚至有關連嘅海外媒體都一大堆，但係量唔代表質，因為佢哋大部分講嘅內容，都係一啲有政治人事目的同利益嘅大話。
每年中國大陸列出嘅統計數字，包括經濟、人口同埋社會，都係吹出嚟，全部都更改調整過。
失業率、人口增長、國民年均收入、醫保覆蓋率同埋教育普及程度等一大堆，呢大堆喺媒體報導嘅“新聞”，幾乎都係由各地嘅謊言結合成：某市某縣市民好滿意政府醫院嘅醫療服務水平；病人係臨時安排嘅；醫護人員好得閑侍候病人係假嘅；醫生診症治療水平高唔係普遍，只係個別現象；醫院官僚作風唔提；醫療事故唔提；咁就編成一則“大外宣”新聞，大家睇完一則社會主義國家醫療系統好好，醫學水平“超英趕美”嘅民生新聞，但真正住過大陸醫院嘅人，應該感受到有幾“地獄” 。
官媒同好多“民營”媒體報道一個公共範疇係咁樣運作，而其他社會同政府民政民生新聞報導手法都係同一方式運作嘅時候，你可以想像到，呢個謊話構成嘅體積同覆蓋面有幾大：十幾億人口，包括海外生活緊嘅華人，都睇緊講同一個大話嘅新聞報導，聽緊同一個大話嘅播報。
中國共產黨講嘅謊言，已經走勻全世界。大家都知道呢個係一個非常龐大嘅宣傳系統，但呢個宣傳系統由好多利益交織而成：養活咗好多依靠呢個外宣系統獲得工作機會同薪水嘅人，同時亦做緊好多破壞其他地方嘅壞事：19年疫情初起時，無媒體揭露武漢疫情，全世界掉以輕心結果幾年來死亡枕藉；一帶一路項目嘅新聞，只提中國如何拉動第三世界經濟，但唔提佢哋賄賂官員同設下嘅債務陷阱，結果令當地居民生活環境被破壞、政府因龐大負債而面臨破產困局。
仲有數以百萬計受逼害嘅少數民族好似維吾爾人、藏人、蒙古人、維權律師同好多無權無勢受逼害嘅小市民，佢哋求助嘅聲音都俾大外宣系統壓制住，壓制力度幾大幾殘忍從法輪功同藏佛呢啲宗教受逼害之深可窺一二，所以你可以見到一啲漏網新聞講到有市民怒罵官媒採訪嘅時候如何無恥，無視民間疾苦，果種求助無門，政府部門扮無嘢，卻被官媒拎嚟粉飾太平係幾荒謬。
呢個龐大嘅謊言機器，背後嘅操縱者就係官媒擁有人，中國大陸寡頭嘅當權領導，佢哋有時會因利益互相攻擊嘶咬，有時會因生存受威脅，而暫時合作掩飾彼此做過嘅壞事，集中火力攻擊批評一啲覺得威脅到佢哋權勢，或主觀情感憎厭嘅目標，以求喺國內複雜嘅傾軋政治中得到分享人事利益，呢啲人事利益可以係無形嘅權力、信任甚至男女關係，而有形嘅金錢、職位同利益承諾，都係呢個外宣系統裏面嘅交易籌碼。
最後受損害嘅，只係全中國大陸同海外華人，因為信用罄盡，華人俾大外宣系統綁架，大外宣系統利己殘人自肥，滿口大話連六四無死人同埋無活摘器官，香港好民主之類都講得出，其實係破壞緊全世界嘅發展同行之有效嘅法規，將國際社會尊重嘅條約精神徹底破壞。