百年地圖炮

民國時代魯迅批評華人某啲迂腐嘅文化陋習不遺餘力，如果以今日標準來講，他應係第一代地圖炮宗師，發炮對象直指東亞大陸大部分華人。
近十幾年網絡世界將好多地域嘅生活實況展現出來，呢種將當地社群一些爭議行為拍低上載批評，或喺討論區發帖議論甚或直斥嘅現象好普遍。
記得早年喺大陸網上有些順口溜，基本把中國大陸三十一個省市轟遍，順帶把台灣香港澳門也炮轟一輪。以前會覺得呢種地圖炮無意思，覺得唔係每個上海人都咁勢利，每個河南人都咁貪錢，每個溫州人都炒樓，廣東上海江蘇人唔炒樓？深圳台灣澳門人唔貪錢？山東人就一定彪形大漢？東北人就一定粗聲粗氣？當時確係咁諗。
但近幾年從大陸經濟急轉直下，社會中底層生活艱難，而社會言論又不斷收緊，從新疆西藏香港台灣甚至海外異見者受逼害，開始覺得地圖炮係有意義。
佢唔係一種歧視或者無限上綱，係反映成個中國大陸缺乏一種反省同改過嘅能力。呢啲反省、改過同容許討論嘅空間，係一個社會改變、進步嘅動力，但我只係見到所有嘅瑕疵同做得唔好嘅地方，大部分人都傾向不斷用說謊、禁言同靠惡靠勢力遮掩缺失，大家都競相做呢啲掩耳盜鈴嘅反智行為，結果就變成所有嘅不公不義之事以更大倍數增長，越來越多荒謬絕倫嘅事發生。
係嘅，唔係每一個潮州人都大男人，唔係每一個廣州人都會講句嘢都加個粗口助語詞，但呢種地圖炮提醒大眾包括我自己，原來自己生活嘅地方有呢種較普遍嘅文化現象同職場陋習，咁係咪呢個地方嘅教育或者生活環境出咗問題？令啲人咁躁狂一出口就問候人父母？點解地圖炮講到澳門人除咗賭錢買嘢食就咩都無？係咪澳門嘅工作類型比較單一，太倚賴賭業同旅遊？咁如果我係澳門嘅學生，將來畢業想做其他工作，係咪要離鄉別井走去其他城市先有機會搵到自己喜歡嘅工作？定抑或真係如地圖炮咁講，生於澳門，只能做一個荷官，再力爭成為第二位賭城大亨？
我相信魯迅當日寫嘅狂人日記等作品，一大堆批評華人文化陋習嘅地圖炮，唔係刻意講到每個華人都係食人族每樣傳統文化都一定係衰嘅唔應該保留。但係容許地圖炮嘅存在，係想華人時刻提醒自己，你哋身處嘅社會確係有呢類社會現象，到底係去瞭解同改善，定係扮唔知睇唔到死唔認不敢面對？
地圖炮同魯迅嘅珍貴價值，就係佢哋令華人正視自己社會同文化嘅真實地方，而唔係自欺欺人，愚昧到返回清末民初民智仍閉塞嘅時代，一味否認自己做得唔好嘅地方，咩錯事都係批評者別有用心，咁嘅態度只會令人原地踏步。
地圖炮，有總比無好。