終結暴政分邦自主（三）

無唔分邦嘅理由。
如果北京派過嚟嘅駐地長官，能夠喺當地做返啲符合當地人期望嘅事情，或者唔係以北京本位思考，擺明暴歛錢財或消滅當地文化，或者可以令現今呢個共產黨國家維持住基本向心力。
但好明顯中國共產黨嘅暴力本質注定佢哋吸收同派出嘅官僚，受過幾多教育都好，整定係會倒行逆施。
佢哋嘅核心原則就係鬥爭同埋統戰，鬥爭係一切綱領，本身就已同以民為本嘅公僕精神不能相容。
一個咁暴力嘅執政黨，佢入面訓練同透過人事鬥爭提拔出嚟嘅管理層，變成根本唔係以民眾利益為首嘅公共政策執行者，只係以少數頂層領導人意願同利益為依歸嘅“家奴”，咁同封建社會專制王朝有咩分別？只係“民主集中制”包裝，肆行特權階級之實。
有幾多特權紅二三四代後人，同手執地方大權嘅官僚，肆行掠奪聚歛地方錢財，出賣挪用侵吞當地資源，變成大家口中嘅“鬼國”日常？
而成個中國大陸咁大，每個地方都有佢哋唔同嘅發展需要，資源分佈同人口結構，唔係每個地方都要發展到好似北上廣深咁款，亦唔係每個地方都有條件起咁多基建鬼城公路醫院。
內蒙古鄂爾多斯被民眾戲稱鬼城，一個人口二百零萬嘅城市，係內蒙古最重要嘅經濟文化中心，佢有幾多乘客使用量撐起咁多基建鐵路？如果收費太貴，無人會用；如果收費太平，又回本無期，於是又要從其它省市財政拎去補貼，又引起其他地方不滿，亦對其他地方居民不公。
而最尷尬係鄂爾多斯適唔適合用呢種大量基建或土地財政夾硬建設成現代化城市都係疑問，每年北京收到嘅內蒙古財政收支報告真係有苦自己知，但呢種錯誤規劃同胡亂發展變成地官員考核同搾取利益過河濕腳嘅機會時，焉有不錯有錯做之理？結果令一大堆國企孭上巨大財政黑洞：少人乘搭嘅高鐵、無人住嘅公寓大樓、空蕩蕩嘅公路，結果扶唔起鄂爾多斯同內蒙古，只係為呢個地方平添多一個“鬼城”戲稱。
佢唔係唯一一個惡例，而係中國大陸數以百千計市縣裏面其中一個比較為人熟悉嘅例子。
當大家埋怨點解自己喺居住地方揸車每過一小段公路都密密俾買路錢，咁有無問你哋交咗咁多咁貴咁密嘅買路錢去咗邊？
被挪用咗補貼呢啲無效率無用嘅政府基建？然後挪用咗錢嘅官就拎住份財政報告向北京話今年我哋GDP又翻了一翻，實情係工程公司同佢哋利益圈個錢包翻了一翻。
這就是佢哋共產黨口中講嘅改革開放成果，但至今只苦了市民，肥了領導層。
一個咁落後，脫節同自私嘅行政管理組織，焉有服從不反之理？憑咩佢哋共產黨嘅人唔受市民監察督責，夾硬決定我哋稅收嘅用途？甚至唔用喺當地民眾身上？