終結暴政分邦自主（統戰六之一，未完）

統戰，統一戰線手段嘅簡稱，顧名思義係一種軍事策反戰略，屬於應對敵國軍事手段，係軍事範疇而絕唔係本國公共行政範疇。
統戰嘅手法係所有能策反對方嘅條件同方法都可用上：威逼、利誘、游說、動以情。如果以上皆無效，就要令對方發揮唔到作用，任何可令對方崩潰嘅方法亦會用上。
簡單啲講，統戰就係無底線達到目的，但本質係軍事思維敵我交戰嘅模式，目的係消滅對方嘅反抗能力。
負責統戰工作嘅人亦好簡單，做人底線越低越好，人格越卑下越無原則越勝任。
唯一要求係忠於黨或至少表面忠於黨，驗證方法係能夠為黨做盡最難睇最污穢最損人格嘅工作，甚至口才都未必需要好，游說唔到，就令對方失去作用甚至消失嘅前題下，呼應返之前提到，夠卑劣無底線嘅，就係最勝任統戰工作。
而共產黨，往往就係用對付敵國軍隊或國民手段，對付自己國民，呢個亦係中國大陸各地公共行政唔能夠起步，有發展善治善政同糾錯功能嘅公共行政基礎嘅原因。即使有完善公共行政制度嘅香港，以及政黨輪替經驗嘅台灣，都飽受統戰腐蝕人心同蛀蝕破壞制度嘅遺害同衝擊，港台兩地係受統戰蹂躪得最深嘅地方，亦係令最多人人格墮落嘅地方。